حكومه‌تا هه‌رێما كوردستانێ
وه‌زاره‌تا ئاوهدان كردن ونیشتهجێ كردن
به‌رێ بنیاتی بۆ بجهئینانا پرۆژێ (دوریانا گرشین ــ دوریانا سحێلا) هاته دانان
ب چاڤدێریا به‌رێز (نێچیرڤان بارزانی) سه‌روكێ حكومه‌تا هه‌رێما كوردستانێ ل رۆژا (2017/9/23) ب ئاماده‌بونا به‌رێزان (فه‌رهاد ئه‌مین ئه‌تروشی) پارێزگه‌رێ دهوكێ و (صدقی ئامێدی) بریكارێ وه‌زاره‌تا ئاڤه‌دانكرن و ئاكنجیكرنێ و (ئوسمان یونس) جێگرێ پارێزگه‌رێ دهوكێ و قایمقامێن قه‌زایێن زاخو وسێمێلێ وچه‌ند به‌رپرسێن فه‌رمانگه‌هێن په‌یوه‌ندیدار رێ ورسمێن دانانا به‌رێ بنیاتی بۆ چێكرنا رێكا (دوریانا گرشین ــ دوریانا سحێلا) ژ رێكا گشتی یا ده‌ولی دهوك - ابراهیم خه‌لیلا زاخۆ، هاتنه گێران.
لبه‌راهیێ ئه‌ندازیار (مه‌عصوم ابراهیم سعید) رێڤه‌به‌رێ گشتی یێ رێك وپرا وئاڤه‌دانكرن ونیشته‌جێكرنێ ل پارێزگه‌ها دهوكێ په‌یڤه‌ك خاند و تێدا رونكرن دانه سه‌ر رێكا ناڤبری و گرنگیا وێ بۆ كاروبارێن بازرگانی و هاتن وچونا گشتی یا خه‌لكێ هه‌رێما كوردستانێ و گوت ئه‌م وه‌كو رێڤه‌به‌ریا گشتی یا رێك وپرا دڤی كاودانیدا باشترین دیاری پێشكێشی خه‌لكێ خویێ كوردستانێ دكه‌ین بۆ وێ یه‌كێ خه‌لكێ مه هاتن وچونا خو یا بله‌ز و ئاسایی و بێ ئاسته‌نگی بكه‌ت.
پاش به‌رێز (فه‌رهاد ئه‌مین ئه‌تروشی) پارێزگه‌رێ دهوكێ په‌یڤه‌ك پێشكێشكر وگوت: ئه‌م وه‌كو حكومه‌تا هه‌رێما كوردستانێ به‌ری نوكه و نوكه‌ژی كار دكه‌ین كۆ رێكێن گشتی دناڤبه‌را هه‌موو باژێر و باژێركێن پارێزگه‌هێن هه‌رێما كوردستانێ دورستكه‌ین بۆ وێ یه‌كێ كاروبارێن بازرگانی وهاتن وچونا گشتی یا خه‌لكێ كوردستانێ بهێته خوشكرن.
هه‌روه‌سا گوت مه هه‌ولدایه رێكێن هه‌موو قه‌زایان ب سه‌نته‌رێ پارێزگه‌هێ ڤه گرێده‌ین وخوشكه‌ین تایبه‌تی رێكا (دهوك ــ زاخو) كێمه‌ك مایه دێ بدوماهی هێت هه‌روه‌سا رێكێن دهوك شیخان و به‌رده‌رش و ئاكرێ كارێن به‌رده‌وام ل سه‌ر هاتینه كرن وكێم ماینه دێ ب دوماهی هێن.
و (رێكا ابراهیم خه‌لیلا ــ دهوك ) به‌ری نوكه ژی كار ل سه‌ر هاتیه كرن و ئه‌ڤرو ژی به‌رێ بنیاتی بو پارچه‌كا دی هاته دانان رێكه‌كا گرنگ و ده‌ولی یه وبزاڤه‌كا بازرگانی یا به‌رده‌وام لسه‌ر هه‌یه وئه‌و رێك ب پارێزگه‌هێن هه‌رێمێ و عیراقێ و تركیا ژی ڤه دهێته گرێدان.
پارێزگه‌رێ دهوكێ ته‌كه‌زكر كو دڤێت كومپانیا جێ به‌جێكار ل دوڤ ستانده‌رێن بۆ هاتینه ده‌ست نیشانكرن وێ رێكێ بجهبینیت و كاره‌كێ دورست ئه‌نجامده‌ت و ل دوماهیێ سوپاسیا سه‌روكێ حكومه‌تا كوردستانێ و وزیرێ ئاڤاده‌نكرن وئاكنجیكرنێ و هه‌موو لایه‌نان كر یێن بوینه هاریكار بۆ بجهكرنا ڤێ رێكا ده‌ولی.
پاش ب فه‌رمی به‌رێ بنیاتی بو رێكا ناڤبری ژلایێ پارێزگه‌رێ دهوكێ وبریكارێ وه‌زاره‌تا ئاڤه‌دانكرن وئاكنجیكرنێ هاته دانان.
هه‌ژی گوتنێ یه رێكا (دوریانا گرشین بۆ دوریانا سحێلا) ژ رێكا گشتی یا ده‌ولی دهوك ابراهیم خه‌لیلا بكوژمێ (53،648،662) دولاران دێ هێته ئه‌نجامدان پارێ رێك ژ لایێ قه‌رێن سندوقا ده‌وله‌تی هاتینه دابینكرن ، رێك یا دوو سایده (20 كم) یا درێژه و دگه‌لدا (4) ئه‌نده‌ر پاس ودوو پرێن هاتن وچونێ هه‌نه و رێك هه‌موو دێ هێته په‌ژانكرن چونكو رێكه‌كا بله‌زه دا وه‌لاتی وگیانه‌وه‌ر بهێنه پاراستن پروژه ژلایێ كومپانیا تركی (هه‌گه‌گه) دێ هێته چێكرن وبریاره دماوێ (900) روژان دا بكه‌ڤیته دخزمه‌تێ دا.