بناڤێ خودایێ مەزن و دلوڤان
خەلکێ خوشتڤی یێ پارێزگەها دهوکێ و کوردستانێ ب گشتی وەک ژناڤێ رێڤەبەریا مە یا دیار کو (رێڤەبەریا گشتی یا رێک و پرا و ئاڤەدانکرن و نیشتەجێکرنێ ل پارێزگهها دهوکێ) کو کارێ رێڤەبەریا مە (دوو) سەکتەرێن سەرەکی ب خوڤە دگریت:-
١- سەکتەرێ رێک و پران.
٢- سەکتەرێ ئاڤەدانکرن و نیشتەجێکرنێ.
ئێک / سەکتەرێ رێک و پرا :- رێک و پر دهێنە هەژمارتن ستوینا سەرەکی یا ئاڤاکرنا وولاتان و شا دەمارا ڤەژاندن و بوژانەڤە یا هەمی سەکتەرێن دی د هەر وولاتەکی دا لەورا رێڤەبەریا مە یا گشتی و رێڤەبەریێن سەرب رێڤەبەریا گشتی ڤە ئەوێن تایبەتمەند دڤی بواری دا ئەڤ چەندە کریە دەستورێ کارێ خو کو هەر ژ دەستپێکا دامەزراندنا ڤان رێڤەبەرییان و تا ئەڤرو بەردەوام کار ل سەر وێ چەندێ هاتیە کرن کو روژ ب روژ ئەڤ سەکتەرە بەرەڤ پێش بچیت و ژێرخانەیا رێک و پران ل وولاتێ مە بگەهیتە ئاستێ وولاتێن پێشکەفتی یێن جیهانێ و سوپاس بو خودایێ مەزن کو ئەڤرو ئەم دبینین ئەڤی سەکتەری پێشڤەچونێن گەلەک باش ب خوڤە دیتینە و ب باوەریا مە خەلکێ پاێزگەها دهوکێ و هەرێما کوردستانێ ب گشتی دیدەڤانن ل سەر ڤێ پێشڤەچونێ چونکی خەلکێ مەیێ خوشتڤی باش یێ پێ ئاگەهە کو پشتی سەرهلدانا پیروز ژێرخانا رێک و پران ل وولاتێ مەگەلەک یالاواز بو بەلکو دشین بێژین هەرنەبو لێ ب پیتەدانا کابینەیێن ئێک ل دویف ئێک یێن حکومەتا هەرێما کوردستانێ و ب خەمخورییا ئەندازیار و هەمی تیمێن رێڤەبەریێن مە هەر ژ دەستپێکێ و تاکو ئەڤرو ئەڤ سەکتەرێ گرنگ راکریە ڤە و گەهاندە ڤی ئاستێ ئەڤرو ئەم دبینین کو جهێ شانازیا مە هەمیانە لێ دڤێت ژبیرنەکەین کو ئەڤ چەندە ب ساناهی دروست نەبویە بەلکو ژ بلی رەنج و ماندیبون و کەدا هەمی هەڤالان قوربانیژی هاتینە دان و ب تایبەت ل دەمێ شەرێ نەخواستی یێ تیرورستێن داعش ل سەر هەرێما مە سەرەرای کارێ خو رێڤەبەریا مە ب هەمی رێڤەبەریێن خوڤە کەفتیە د خزمەتا سەنگەرێن پێشمەرگێن چاڤ نەتەرس دا ژبو پاراستنا دەسکەفتێن گەلێ مە لێ ب مخابنیڤە هژمارەک ژ هەڤالێن مە گیانێ خو گوری کوردستان و دەستکەفتیێن وێ کر ، ل ڤێرە دبێژینە وان گیانێ هەوە شاد و دبێژینە هەڤال و کەس و کارێن وان سوزبیت د بەردەوم بین ل سەر ئاڤەدانکرنا کوردستانێ داکو گیانێ وان و هەمی شەهیدێن کوردستانێ یێ ئارام بیت.
دوو / سەکتەرێ ئاڤەدانکرن و نیشتەجێکرن :- ئەڤ سەکتەرە ژی دهێتە هەژمارتن ژ سەکتەرێن گرنگ و سەرەکی د ژێرخانا وولاتاندا و دڤی سەکتەری داژی پشتی سەرهلدانا پیروز کارێن گەلەک باش هاتینە ئەنجام دان کو جهێ شانازییەکا مەزنن چ ژ ئاڤاکرنا ئاڤاهیێن میری و یاریگەه و هوڵ و مزگەفتان بگرە چ ژ ئاڤاکرنا گوند و دێهاتێن پارێزگەها دهوکێ و چ ژ دروستکرنا یەکەیێن نیشتەجێبوونێ بو هاوولاتیێن کێم دەرامەت ل سنورێ پارێزگەهێ کو ئەڤە ب خوژی نیشانا گرنگیدانا کابینەیێن ئێک ل دویف ئێکێن حکومەتێ بویە بڤی سەکتەرێ گرنگ کو ب راستیژی گەلەک ژوان ئاڤاهیان نوکە بوینە نیشانا جوانی و پێشڤەچوونا ڤی باژێرێ جوان کو ب کەدو ماندیبونا ئەندازیارێن دەست رەنگین و تیمێن رێڤەبەریا ئاڤەدانکرنێ ب ئەنجام گەهشتیە.
ل دوماهیێ دبێژین کاروانێ ئاڤەدانکرنێ ل وولاتێ مە هەرو هەریێ بەردەوام بیت و بەرەڤ پێشڤە بچیت تاکو دگەهینە ئاستێن گەلەک بلندێن کو وولاتێن پێشکەفتی یێن جیهانێ گەهشتینێ و ببیتە بنیاتێ موکم یێ دروستبونا دەولەتا کوردستانێ و بلندبونا ئالایێ مەیێ رەنگین دناڤ ئالایێن جیهانا پێشکەفتی دا.