په‌یڤا رێڤه‌به‌رێ گشتی

    يا خويايه‌ كو سالا (2016) هشكترين سالا دارايى بوو به‌راورد دگه‌ل سالێن بورى د بياڤێ رێك و پرا و ئاڤه‌دانكرنێ دا، لێ كاروانێ ئاڤه‌دانكرنێ هه‌ر يێ به‌رده‌وام بوو و نه‌بونا بودجه‌ى و كێميا موچه‌ى  نه‌شيان ببنه‌ رێگر به‌رامبه‌ر كارمه‌ندێن رێڤه‌به‌ريا گشتى يا رێك و پرا و ئاڤه‌دانكرنێ و نيشته‌جێ كرنێ ل پارێزگه‌ها دهوكی بو ئاڤه‌دانكرنا كوردستانێ.

     به‌لكو شيانێن خو پتر لێكرينه‌ و كاره‌كێ ئێكجار مه‌زن د بوارێ چێكرنا رێك و پرا و تونێلا و كۆنترۆلكرنا ترومبێلێن بارهه‌لگر و د بوارێ سه‌خبێرى كرنا رێك و پرا وئاڤه‌دانكرنێ دا ئه‌نجامدايه‌.  كارمه‌ندێن مه‌، مه‌ردانه‌ هاتينه‌ پیش و بۆ خه‌لكه‌كى دياركريه‌، كو ب راستى پێشمه‌رگه‌يێن ئاڤه‌دانكرنێ نه‌ و تيمێن مه‌ ب هه‌سته‌كا وه‌لات پارێزى مل ب ملێ پێشمه‌رگه‌يێن قاره‌مان ب درێژاهيا به‌روكێن شه‌رى ژ (ميحوه‌رێ شنگالێ ـ كه‌سكێ ـ به‌نداڤا مووسل ـ تلسقوف تاكو ميحوه‌رێ خازرى) كاركريه‌، بگره‌ ژ چێكرنا سه‌نگه‌ران و لێدانا خه‌نده‌كان و چێكرنا چه‌په‌ران  و ڤه‌كرن و سه‌خبێريكرنا رێك و پرا.

     د رێيا پيرۆزا ڤى كارى دا، ل ئه‌ڤ ساله‌ دوو كارمه‌ندێن مه‌ يێن قاره‌مان شه‌هيدبوينه‌، ئه‌و ژى هه‌ردوو شه‌هيدێن قاره‌مان ( ويسى گابێركى ) و ( عبدالمناف دوسكى ژورى ) بوون، كو ب شه‌هيدبوونا ڤان هه‌ردوو مێرخاسا هه‌ژمارا كارمه‌ندێن مه‌ يێن شه‌هيدبووى گه‌هشته‌ پێنج شه‌هيدان، ئه‌ڤه‌ ژی جهێ سه‌رفه‌رازى و سه‌ربلنديا مه‌ هه‌ميانه‌.

     ژ هه‌ژيه‌ بێـژين ل سالا (2016) بتنێ،  (4,120) چار هزار و سه‌د و بيست ئاميران ل به‌روكێن شه‌رى كاركريه‌، كو ب تێكرايێ دبيته‌ (11) يازده‌ ئامير د رۆژه‌كێ دا، هه‌روه‌سا (557) پێنج سه‌د و پێنجى وحه‌فت ره‌بييه‌ هاتينه‌ چێكرن و سه‌خبێريكرن،  (80 كم) هه‌شتێ كيلۆمةترێن خه‌نده‌كان ژی هاتينه‌ چێكرن و سه‌خبێركرن، هه‌روه‌سا  (121 كم) سه‌د و بيست و ئێك كيلۆمه‌ترێن رێكێ هاتينه‌ ڤه‌كرن وسه‌خبێريكرن (155 كم) سه‌د و پێنجى و پێنج كيلۆمه‌ترێن چه‌په‌ران هاتينه‌ چێكرن وسه‌خبێريكرن.

   هه‌روه‌سا پێشمه‌رگه‌يێن ئاڤه‌دانكرنێ قاره‌مانيه‌كا دى ژی توماركريه‌، كو ل سه‌رتاسه‌رى پارێزگه‌ها دهوكێ كۆنترۆلا سه‌خبێريكرنا رێكێن سه‌ره‌كى و لاوه‌كى كريه‌، ل ده‌مه‌كى كو ل هنده‌ك جهان هزر د هندێ دا د هاته‌كرن كا ده‌واما فه‌رمى بكه‌ن يان نه‌، لێ كارمه‌ندێن مه‌ ل به‌ر گه‌رما هاڤينێ گيانێ خو د ئێخسته‌ د مه‌ترسيێ دا و دلسوزانه‌ رێكێن سه‌ره‌كی و لاوه‌كی سه‌خبێريكرينه‌،  بتنێ د ئه‌ڤ  ساله‌ دا (400 كم) چارسه‌د كيلۆمه‌ترێن رێكێن سه‌ره‌كى و لاوه‌كى هاتينه‌ سه‌خبێركرن سه‌ره‌رايى سه‌خبێريكرنا هنده‌ك رێكيت گوندان يێن فه‌ر،  جهێ ئاماژه‌پێكرنێ يه‌، ئه‌ڤ ساله‌ پتر ژ (1,252,000 م²) مليۆنه‌ك و دو سه‌د و پێنجی و دوو هزار مه‌ترێن چوارگۆشه‌ يێن كارێ قێركرنێ هاتيه‌ ئه‌نجامدان، ديسان كار د (12) دوازده‌ پرؤژه‌يێن چێكرنا رێك و پرا دا هاتيه‌ كرن.

    سه‌ره‌رايى راوه‌ستيانا هنده‌ك پرۆژه‌يان، لێ ئه‌ڤ ساله‌ ب كوژمه‌يێ پتر ژ (39,463,194,000) سيه و نه‌هـ مليار و چار سه‌د وشێست و سێ مليۆن و سه‌د و نۆت و چار هزار ديناران كار هاتيه‌ كرن، كو پرانى كارێ چێكرن و سه‌خبێريكرنا رێك و پرا بوويه‌. ديسان ل ئه‌ڤ ساله‌ ئه‌نجامدانا (4) چار پرۆژه‌يێن ئاڤه‌دانكرنێ بدويماهيك هاتينه‌، هه‌روه‌سا بۆ كۆنترۆلكرنا بارێن ترومبێلێن بارهه‌لگر، وێستگه‌هێن مه‌ يێن كێشانێ شياينه‌ بارێن (846,029) هه‌شت سه‌د و چل و شةش هزار و بيست و نه‌هـ ترومبێلێن بارهه‌لگر كۆنترۆل بكه‌ن، داكو رێكێن مه‌ ژ تێكچوونێ د پاراستى بن..

    ل داوييێ من دڤێت بێژم، ئه‌م ده‌ستخوشيێ ل وان كۆمپانيان دكه‌ين، ئه‌وێن د ڤێ قه‌يرانێ دا ده‌ست ژ كارێ خو به‌رنه‌دايى و به‌رده‌وام بووين ل سه‌ر ئه‌نجامدانا پرۆژه‌يێن خو،  هه‌روه‌سا ئه‌م ده‌ستخوشيێ ل كارمه‌ندێن خو دكه‌ين كۆ دلسوزانه‌ كارێ خو ئه‌نجامدايه‌ خودا پشته‌ڤان و هاريكارێ مه‌ هه‌ميا بيت و ئالايێ كوردستانێ هه‌ر بلند بيت،  كوردستان هه‌ر ئاڤه‌دان بيت..